ماذا يحدث في مدارسنا ؟ التعليم الخاص جدًا جدًا
ناس كتير بتسأل ايه أفضل مدرسه ممكن نروحها او نودي ولادنا فيها السؤال ده بقي شاغل ناس كتير جدا في مصر لان التعليم الحكومي لم يعد يقدم اي فائده تذكرللاطفال و ده دفع الأهالي انهم يلجأو للتعليم الخاص و ما ادراك ما التعليم الخاص في مصر المحروسه. المدارس الخاصه في مصر تقع تحت طائفه ( اللقمه السهله ) او السبوبه الحلوه . كل واحد يلاقي معاه شويه فلوس زياده يفكر علي طول و بدون تردد انه يفتح مدرسة مش فارقه بقي كان جزار او مقاول او حتي موظف حكومه واصل و معاه قرشين - من اين له هذا ؟- و ده خلي التعليم الخاص مرتع للنصابين و الجهله اللي بالتالي ادي لتدني مستوي الخدمه التعليميه المقدمه للاولاد !!
بحكم عملي في التعليم و دراستي ( اتنين ليسانس و دبلوم من كامبريدج و الدبلومه التانيه برضه في التعليم ( بدون حسد يا جماعه ) خلي ناس كتير تسالني السؤال ده : نودي ولادنا انهي مدرسه؟ ردي عليهم كالتالي :
لما تحب تنقل ولادك مدرسه او توديهم لمدرسه لازم تختار المدرسه وفقا لعده أسس أولها
١-المكان و جودته من الناحيه الامنيه و المساحات الكافيه للأولاد علشان يقدروا يتنططوا ! ايوه يجروا و يتنططوا ده بيساعد في صحه ابنك النفسيه و يخليه يقبل علي التعليم بنفس حلوه و يبقي مبسوط كده !.
٢- الإمكانيات المعروضه و المستغله يعني مثلا مدارس كتير عندها سبورات ذكيه و تكييفات و اجهزه كمبيوتر الأولاد و الأهالي ما بيشوفوهاش غير مره واحده بس لما ييجوا يقدموا و باقي السنه معروضه ديكور ( لزوم لم الزبايين يعني ) يبقي نشوف المعروض الاول و قبل ما نقرر ننقل نتأكد ان المعروض ده مُستٓغل و مفعل!
٣-جوده المدرسه مش بـ"الاستاف" بتاعها أبدا لان اي مدرس كويس اكيد هيؤدي شغله صح لانه شاطر ، لكن السؤال هنا: هي المدرسه دي غيرت الاستاف كام مره ؟ أقولك يبقي تأكد تماما ان المدرسه دي او القائمين عليها ما بيدوش للناس حقوقهم و ما فيش عقود و مافيش قانون عمل و شغالين بلطجه و معني كده ان مهما شوفت مدرسين كويسين عمرهم ما هيعمروا أبدا .. يبقي اوعي تنخدع و تقول الله!!
٤- أتأكد من الأنشطة في المكان ؛ اسأل أهالي كتير من اللي ولادهم في المدرسه مش واحد او اتنين ( لان الاتنين دول غالبا بيبقوا تبع المدرسه و مظبطين امورهم معاهم و بيشتغلوا بوق دعايه للمدرسه فعمرهم ما هيقولوا الصدق ريح نفسك ) شوف بقي الرحلات و الحفلات و فصول الأنشطة اثناء اليوم الدراسي !! الأنشطة دي محتاجه مدرسين زيادة عن مدرسين الحصص الأساسيه لو ما لقتش ده يبقي القائمين علي المدرسه مستخسرين انهم يعينوا حد يبقي برضه المكان ده ما ينفعش !
٥- في كل مدرسه محترمه بيكون هناك خطه أسبوعيه ليه ؟ علشان المفروض ان يكون في كل قسم مدرس او اتنين زيادة علشان لو غاب مدرس يدخل ال roaming teacher ده مكانه و يشرح و يكمل المنهج مش يضيع الوقت علي الأطفال و يفضلوا يتنططوا في المدرسه بدون دراسه _ و يا ريتهم بيتنططوا دول ممكن يتحبسوا في الفصل مع مرس مش طايق نفسه انه خد حصه احتياطي- !!
٦- في كل قسم بيكون فيه ماكينه تصوير و كمبيوتر خاص بالمدرسين فيه علشان سرعه و سهوله كتابه و طبع و توزيع اي أوراق عمل او نشرات للأولاد . فيه مدارس كتير ما عندهمش غير ماكينه تصوير واحده من عهد الملك فاروق ( هو كان فيه وقتها مكن تصوير اصلا ؟) و بالدور يا سيد انت و هو و ما فيش غير رزمه واحده !!
٧-الباصات لو مش بتاعت المدرسه اوعي تودي ابنك أصلا !! لان كده المدرسه مش فارق معاها ابنك هيحصله ايه اكتر ما يفرق معاهم هيوفروا قد ايه و كده كده انت الخسران!! الا اذا بقي كانت مدرسه محترمه ( و ده نادرا ) تتعاقد مع شركه كبيره
8- النضااااااااااافه و الاشرااااااااااف و حطوا تحتهم ٢٠٠ خط 'ما يمنعش ان ابنك او بنتك يجيلهم زحار ولا نزله معويه من قله النضافه و الا مخبوط او متعور , ماهو مافيش مشرفين و لا رقابه كافيه علي الاولاد - لزوم التوفير و الله - !!
٩- اخر حاجه و اهم حاجه بقي يكون في المدرسه فصل الادارة عن راس المال ! يعني ما يجيش اصحاب المدرسه يعينوا مدير او مسؤل و هم اللي بيديروا المكان و لا كأنه طابونه و بيتدخلوا في كل كبيره و صغيره و لما تحصل مشكله يجيبوا الشخص اللي هو المفروض مدير و يحطوه في وش المدفع ( قصدي الأهالي ) و يتوه الاهالي ياعيني مش عارفين يروحوا فين و الا يكلمو مين !
اما بالنسبه للمناهج و طرق التدريس و الأنشطة المصاحبة فحدث و لا حرج : ازاي تقيس نجاح و تحقيق الأهداف التربويه و التعليمية لمدرسه:
١-اختيار المناهج و الكتب لازم يكون علي اساس دراسه وافيه و متخصصه كي تلائم العمر العقلي للطفل و نموه الفسيولوجي يعني ما اجبش كتاب يطلب من طفل عنده ٥ سنين يكتبلي قصه حياته مثلا !
!!٢- اختيار المدارس علي أساس المناهج الإضافية ( هي ايه المناهج الإضافية أصلا ؟ مافيش حاجه اسمها كده) ما تبصوش علي الكتاب و اسمه لان فيه كتب كتير بتتطلب نوعيه من السبورات الذكيه اللي زي ما قلنا قبل كده ممكن تكون ديكور و بس و انترنت اللي هو مش موجود غير في مكتب صاحب المدرسه بس !! يبقي الكتاب ده فشنك و اخدتوا البضاعه من غير ما تجربوها !!
٢- مش كل مدرسه بتدي مذكرات و أوراق عمل كتير تبقي ممتازة !! اسالوا كده أولياء الأمور هو ابنك / بنتك بتدخل النت و تدور علي معلومه ؟ بييجوا يحكولك معلومه جديده او تجربه عملوها باديهم ؟؟ يبقي المدرسه لا عندها انترنت و لا المدرسين عندهم وقت يبصوا حواليهم و لا فيه مكتبه من اصله ( فيه مدارس بتعبي المكتبات كتب مالهاش اي علاقه بتاتا بالمرحلة الدراسية بس علشان التوجيه و التراخيص ) كمان ممكن ما يكونش فيه معمل من اساسه او المعمل مجرد ديكور ( برضه) و لايوجد بداخله لا أدوات و لا مواد لإجراء التجارب !!
٣- حصص التربيه الرياضيه ايه ظروفها ؟ الأولاد بيقضوها كوره و مراجيح و الا فيه تنوع ؟ . حصص التربيه الرياضية مهمه جدا للنمو الفسيولوجي و التآزر الحركي عند الأطفال حاجات كده ما يفهمهاش عير المتخصص مش كل من فتح مدرسه هيكون فاهم ( لان يمكن اصحاب المكان شايفين ان الأولاد مش من حقهم انهم يلعبوا زي باقي الأطفال و مستخسرين يجيبوا أدوات أصلا )
٤- معظم المدارس بتطلب من الأهالي supply list حلو جدا اسأل نفسك بقي ابنك عمل بيها ايه ؟؟ لو ابنك / بنتك راجعين بصوره شيك مقصوصه و متلونه اعرف حضرتك ان ابنك مش اللي عاملها دي المدرسه بتاعته و ابنك ما استفدش حاجه أصلا . لان الطفل لو ما اشتغلش بايده يبقي عمره ما هيتعلم و معظم ال supply list دي بتستخدمها المدرسه ( علشان توفر برضه حبتين تلاته )
٥- نصيحه مهمه جدا... لما تدخل مدرسه علشان تتفرج عليها ما تقعدش مع مسؤل كبير لانه هيوصلك ان الدنيا جنه و فوق الرائعه و يستخدملك تعبيرات كبيره و انت مش هتفهم حاجه و هتهز رأسك و تنبسط باللكنه و خلاص ما هو اكيد مش هتكسف نفسك و تقوله مش فاهم !... امشي في المدرسه بص كويس علي الأولاد و كلامهم مع المدرسين ، طريقه التعامل مع الأطفال ادخل فصل كده و دايما اسأل اسئله مفاجئه و شوف اللي قدامك هيرد بايه !
6- اي مدرسه محترمه لازم يكون فيها ؛ دكتور ، أخصائي اجتماعي ، أخصائي نفسي ، قسم تعديل سلوك و تدخل مبكّر early intervention الأقسام دي بتساعد المدرسين و تدربهم علي انهم يكتشفوا الأطفال اللي عندهم صعوبات تعلم و مشاكل سلوكيه و بتتعامل معاهم و تدمجهم بشكل جيد في العمليه التعليمية و الدكتور طبعا لو فيه طفل أتصاب المدرسه هتعمل أيه ؟ هتكلم صاحب المدرسه ييجي يودي الولد لأقرب مستشفي و الا تكلم الأهل ييجوا ياخدوا ابنهم ؟؟
كل الحاجات دي مش بتبان في زياره او دعايه لان كل اصحاب الاعمال يهمهم جمع الفلوس و بس !! الطلبه بالنسبه لهم مجرد ارقام في كشوف الحسابات البنكيه لا
اكثر و لا اقل !! فكروا في اولادكم علي انك بتربي إنسان مش بتربي آله علشان تنجح من مرحله لمرحله بدون اي مراعاه لاحتياجهم النفسي و العقلي اللي بيتبني عليه شخصيتهم المستقبليه . ما تأذيش طفلك و انت بتنقي الشكل و الا حتي كتر الشغل و الواجبات المنزليه . تخيل نفسك كده عندك زرع هتهتم بيه ازاي ؟ ما تقولش ميه و بس .. ده محتاج ميه و هوا و شمس و تقليب في التربه و ازاله الاجزاء الميته علشان يطلع زرع قوي و مبهج و مريح للنفس. اهو طفلك كده بالظبط . يا ريت تكون اجابتي دي بدايه انك تفكر صح و تختار صح.
