نزلت ولادي المدرسه وانا مش نايمة كويس من امبارح ولقيت في سؤال محشور في زوري فحبيت بدل مااقوله اكتبة لإن الكتابه نوع من انواع الفضفضة وممكن امسح تاني اللي بكتبه كالعاده والسؤال هو... 
احنا ليه عندنا أزمة سكر؟؟؟ واحنا مشهورين بقصب السكر وعندنا اكبر مصانع لانتاج السكر؟! ولقيت اجابه السؤال بترن في راسي... عارفين ليه لاننا ظالمين ظالمين ظالمين
طبعا ظااااااااالمين حكومة وشعبا.. حكومة امر مفروغ منه طب والشعب المسكين البائس السلبي ظالم ازاي... طبعا ظالم لان اشد انواع الظلم ظلم النفس واحنا شعب ظالم لنفسه وساكت وسلبي وماتستغربوش ان فيه ازمة سكر في بلد بتصدر قصب السكر لان هايكون ازمات تانيه جاية كتير غريبة وفريده من نوعها.... سكوتنا في حق نفسنا واهمالنا في صحتنا والرضاء بوزاره الصحه والساده القائمين عليها ظلم....سكوتنا في حق اولادنا ومناهجهم التي يشيب لها الولدان والرضاء بوزاره التعليم والسادة القائمين عليها والمنظومه الفاشله كلها ظلم......سكوتنا في حق اراضينا اللي مليانه خيرات والرضاء بوزاره الزراعة والساده القائمين عليها ظلم.....والي اخره مع كل الهيئات والوزارات كل ده ظلم بين طبعا ومسحملينه وشاربينه وساكتين امال ايه الجديد ايه اللي حصل يعني ماطول عمرنا كده.....اللي حصل ياساده واللي بسببه هانعيش في ازمات ولعنات وهانخرج من سكر ندخل في عيش ونخرج من عيش ندخل في جنيه.... ونخرج وندخل الي ان تقف دعوة المظلوم التي تصب لعناتها علينا وعلي بلدنا وخيراتنا..... انا عاوزه اعرف ايه مصير المعتقلين؟ وإلي متي سوف يظلون خلف الاسوار؟ وماهي تهمتهم؟ وكيف توجد نساء وفتيات معتقلات تركن اطفالهن وازواجهن وكثير من الحالات ازواجهن معهن في المعتقلات والاطفال فقط خارج السجون في معية الله كيف لنا ان نهنأ بالنوم العميق وكيف نأمن غدا وان نقوي اقتصاديا وزراعيا وصحيا وتعليميا وهناك غصه في الحلق والم في القلب والالاف الحكايات نقرأها ونشاهدها عن رجال افاضل وسيدات فضليات واطفال تشردوا وبيوت هدمت.
اختلف او اتفق معهم سياسيا ولكن لا تختلف انسانيا..
لم ولن اكن يوما من جماعة الاخوان المسلمين واري اننا جميعا ضحية الغباء السياسي الذي مارسوه ولكن رد الفعل لم يكن مساو ابدا للفعل... اعيدوا النظر في المظلومين والمعتقلين حتي تستقيم امور حياتنا وتقوي بلادنا وينشأ اطفالنا في مجتمع خالي من الفتن والكره والظلم واللعنات.