حرص النجم أحمد حلمي على توجيه رسالة لكل أب عبر حسابه الشخصي على موقع الصور الشهير "إنستجرام" بعد أن نشر صورته مع ابنه سليم. 

وكتب حلمي تعليقًا على الصورة قائلًا: «لما كنت طفل كان كل حاجة في حياتي. جبل كبير ضخم كله قوة، وعلى قد قوته كانت حنيته. عمري ما انسي كف إيده الدافئ وهو حاضن أيديا الصغيرة. نيني عينه اللي بيضحك لما بيبص في وشي. كنت بحس بالأمان لأنه مركز معايا وواخد باله مني. لا شغل شاغله عني ولا اهتمام كان ناقصني. حفظني طريق مدرستي زي ماحفظني أمشي في أول خطوتي من الكنبة للترابيزة وهو بيشجعني ومحاوطني بدراعاته».

وأضاف: «أنه أبي أنه أبويا أنه والدي أنه بابا، اللي زرعه أبويا من اهتمام وتواصل فرق معايا كتير أو بمعنى أدق خلاني أب أعرف أتعامل مع أطفالي شكرا يا أبي شكر دائم ومستمر مدى الحياة شكر أتمنى أني أستحقه وأسمعه من ابني وبنتي لما يكبروا فأشكرك شكر تاني».

وتابع: «شكرا لكل أب بمناسبة عيد الأب، وطبعا طبعا طبعا شكرا لكل ست لأنها هي اللي ولدت وربت كل طفلة بقت أم وكل طفل بقى أب».

واختتم: «يونسيف في الشهر ده بتحتفل بكل أب في مصر وفي العالم كله نزّل صورتك مع ولادك أو صورتك مع والدك مع موقف فاكره أثر في تربية ولادك أو في تربيتك وانت صغير واعمل تاج ليونيسف على @unicef.egypt بهاشتاج #السنين_الأولى_بتفرق علشان تكونوا جزء من الحملة دي».