دخلت عليا بنتي الطفلة الصغيرة في أولي ابتدائي مستخبيه ورا أختها الكبيرة علشان لازم توريني الامتحان ولازم أمضي عليه طبعا..البنت كانت مرعوبة وماسكه في أختها وبتقول لها لأه مامي حتزعل مني مش كل مره كده ..فهمت طبعا وبصيت لبنتي في محاولة فاشلة مني إني أديها الثقه وأني مش حازعل ..دخلت الاوضه وهيا مهزوزه مهزومة ماسكه في أختها وناولتني بإيديها الصغنونه ورقه كبيره مكتوب فيها 11 من 20 ومكتوب جنبها بخط كبير أرجو الأهتمام بمستوي الطالبة 
طاااالبة ؟؟؟؟!!!!!!!!! قلت في سري طبعااا وأبتسامة سخرية مقدرتش اخبيها 
خدت الورقة من بنتي بشويش وبهدوووووووء ولقيت نفسي باخد بنتي في حضني البنت وأختها بصوا لي بإستغراب عملت نفسي مش واخده بالي من نظراتهم وقولت بسرعة أنا مزعلتش أهوه  يازنزونة ياحبيبتي ومضيت علي الورقة اللعينة وكتبت جنب أمضتي جمله جت في بالي ردا علي جملة أرجو الاهتمام بمستوي الطالبه وقولت لبنتي أنا مش زعلانه منك أنتي جميلة وشطوره وأن شاء الله الامتحان الجاي حتجاوبي أحسن من كده بس ركزي ياحبيبتي مع المس في الكلاس وهيا بتشرح أتفقنا...قالت لي اتفقنا وطارت من أدامي تكمل لعبها وهيا بتضحك حتي نسيت تاخد الورقة معاها تحطها في شنطتها ..قمت من مكاني وروحت حطيتها في شنطتها والموضوع خلص بالنسبالي وكملت يومي مناهده وجري ورا العيال وذاكر ياأبني وأقعدي ياحبيبتي وحبه صويت  وصراخ علي شويه خناقات وهيصه من بتاعة كل يوم وتاني يوم بعد ماوصلت ولادي المدرسه لقيت رقم غريب بيتصل بيا ...ألو يافندم حضرتك والدة زينة في برايمري وان رديت بسرعة وأنا مخضوضه أيوه أنا ؛ قلبي أتخلع من مكانه مبحبش تليفونات المدرسة خاااااالص
وكملت بسرعة في حاجة..مين معايا ...زينة كويسة
قالت لي ماتقلقيش أنا مس فلانه المدرس الأول للغة العربية في المدرسه ..أحنا قرينا اللي كتبتيه في ورقة الامتحان بتاعة زينة...ااااااااه إبتسمت وأفتكرت طبعا الجمله العظيمة اللي كتبتها وأنا بمضي وهي "أرجو الأهتمام منكم أنتم بمستوي طلابكم" فكرتني بجملة" أهو أنت" اللي كنا بنرد بيها زماااااان وأحنا أطفال لما كان حد بيشتمنا أو بيقولنا حاجة تضايقنا ومش عارفين نرد عليه.. ... وبصراحة فرحت جداااا إني غيظتهم وأستفزيتهم لدرجة خليتهم يتصلوا بيا بالسرعة دي..أخيرا كل إمتحان اتغاظ لوحدي ويتحرق دمي مع نفسي لاااا بأه حسوا شويه باللي بحس بيه... خدت نفس عميق وسيبتها تبدأ الكلام وتتكلم علشان هيا اللي متصله وأكيد عندها كلام كتييير عاوزه تسمعهولي ... وطبعا كانت متضايقة .. أمتصيت غضبها وقولتلها أولا وقبل ماابتدي أنا بشكر حضرتك علي ذوقك وعلي أهتمامك وردك عليا بصرف النظر عن عدم أعجابك باللي كتبته ابتدت نبره صوتها تهدي وتقول لي العفو ده واجبي بس أحنا بنهتم بطلابنا وواضح أن بنتك متدلعه ومابتكتبش في الحصة والمس بتشتكي منها و..و..و.و......سمعتها بأهتمام ومقاطعتهاش ورديت عليها وقولتلها كمية الكتابه كتيره علي طفله في أولي ابتدائي لسه بتكتب أسمها بالعافيه  ...زينة اللي حضرتك متصله بخصوصها دي ماكملتش سنة ونص في التعليم السنه قبل اللي فاتت كانت كجي وان يادوبك كانت متعلمه تدخل الحمام لوحدها وتعرف شكل أزازة الميه بتاعتها واللانش بوكس اللي فيه المم الجميل وشيلتها من حضني وتقلت عليها هدومها ووديتها للمدرسه مع أخواتها وأنا قلبي معاها والسنة اللي فاتت خدوا كام شهر وبعد كده الكرونا قعدت الكوكب كله في البيت مايقرب من سنه حتي شنطتها بتاعة المدرسة نسيت شكلها يعني يعوض الله علي كجي تو وأدينا أهوه لسه في أول شهر في أولي إبتدائي عاوزاها تكتب إيه ياأستاذه؟؟؟!!!!!!!!
وكملت كلامي.. ونقلتها من مدرستها اللي قضت فيها كجي وان وتو يعني معاكم بقالها شهر عاوزاها تعمل ايه يعني؟؟؟!!! وبعدين الامتحان اللي فات كان جايبه 10 من 20  وده جابت فيه 11 من 20 الله أكبر ماشاء الله بنتي بتتقدم اهوه ضحكت المدرسه وابتدت تهدي كملت بسرعة قبل ماتتعصب تاني وقولتلها أرحمينا يامس أحنا نستاهل الرحمه هو حضراتكم بتمتحنوا وبتقيموا طالب  في ثانويه عامه نظام وزعوا الورق ولموا الورق دي طفلة وأسمها تلميذه مش طالبه علي فكره بأه...أرجوكي خلي المس بتاعتها تبص في عينيها وهيا بتمتحنها وتنطق حرف حرف خليها تطبطب عليها وهي بتمتحن أول إمتحانات في حياتها خليها تضحك في وشها خليها تلمس إيديها خليها تسقف لها ...حررررام عليكم دول أطفال بيبدأوا حياتهم التعليميه وسنواتهم الدراسيه الطويلة المرهقة ...مفروض كلهم يجيبوا الدرجات النهائيه ويزقططوا ويفرحوا ويهيصوا البنت مش عاوزه تروح المدرسة تاني خالص  ....وبعدين أحمدي ربنا يامس دي جابت في العربي 11 من 20  أومال لو كانت جابت 4 من 10 زي الماث كنتي كتبتيلي ايه !!!!!  "أرجو وأد الطالبة" ....هي إيه الدرجات اللي عمالين تبعتوهالي دي،، أنا بنتي عاوزاها تعيش طفولتها وتفرح ويبقي كل الذكريات ليها في المدرسه مفرحة وسعيده عاوزاها تتعرف علي أصحاب جداد وتعرف تتعامل مع مدرسينها وتحبهم وتستمد ثقتها بنفسها عاوزاها تتكلم في المايك وتحكي حواديت عاوزاها بتضحك مرحه متفاءله بنتي مش كائن بالغ راشد داخل الجيش دي طفله حنتسأل أدام ربنا كلنا عنها يوم القيامة وعن نفسيتها 
أحنا كأولياء أمور مشينا وراكم وسمعنا كلامكم كمدرسين أولادنا وكنا بنعاقبهم لكم لما تشتكولنا منهم وتقولولنا ده عيل متدلع ودي بنت سرحانه مش منتبهه قضينا علي ذكاء أولادنا معاكم وكرهناهم في التعليم بسبب أسلوبكم وبسبب نظام تعليمكم وزهقناهم في عيشتهم ..الدنيا مش مذاكره بس ..وعلي فكره المذاكره في السن ده من خلال اللعب بنتي بطلة الحدوته دي لسه مكملة ست سنين الشهرين اللي فاتوا  لسة بعلمها أزاي تتكلم وإيه اللي يتقال وإيه ماينفعش لسه بتنطق الكلام مشقلب وبنموت من الضحك علي كلامها فتكتبه مشبك إزاي ياأستاذه ؟!!!!!!!!!...الله يخليكي يامس انا عاوزاها ترجع من المدرسه منوره وفرحانه كفايه أخواتها الكبار بيرجعوا مطفيين ومفيش حوار بيننا وبينهم غير كلمه ذاكروا ....العيال كرهونا وأحنا كرهنا روحنا وبنلف ورا بعض في حلق مفرغ..أجمل سنين عمرهم راحت وهما شايلين شنط علي ظهرهم أتقل منهم  ظهرهم انحني بنتي اللي في أعدادي بتشتكي من ظهرها اللي جدتي ماتت الله يرحمها عمرها مااشتكت منه أنا حزينه أوي علي نظام التعليم في بلدي وكل شويه نقول اللي جاي احلي ..اللي جاي أحلي...لا بأه ده اللي جاي أسوء بكتير مما نتخيل لو مشينا في نفس الطريق نظر الاطفال هايروح من التاب واللاب والمدرس حيتحول لزومبي غصب عنه وعننا لاستنزافنا والمدرسه حاتتحول لبيت رعب مسكون بالاشباح والعفاريت والأطفال حانعلمهم إن قيمتهم في المجتمع تتحسب بالدرجات حتي علاقاتهم بأصحابهم شويه درجات..الصاحب ده صاحبه علشان شاطر (درجاته كتييييره) والولد ده ابعد عنه ده بليد (درجاته قليله)وممكن طبعااا اللي درجاته كتييييره انتهازي وكداب واناني وبخيل وفيه كل العبر بس وماله شاطر اسم الله عليه  اومااال هايرفع ابني لسلم المجد والنجاح وطبعا كتير جدااا من اللي درجاته  قليله جدع وراجل وبتاع مواقف وصاحب صاحبه وكريم وموهوب بس ابعد يابني عنه لحسن حتبأة فاشل زيه خليك دايما ياحبيبي يابني مع أبو درجات كبيره وكتيره ...معنديش كلام اقوله !!!
وماتزعلوش بعد كده من ولادكم لما يتلزقوا في ابو ورق كتير المتريش الندل الجبان الخبيث و البنت لما تبيع نفسها للعريس اللي هايدفع أكتر وتفضله بصرف النظر عن المضمون والجوهر ماانتو اللي ربتوهم  علي ان ابو كتييير يكسب  ...أحنا بنعمل ايه في ولادنا بس؟؟؟؟!!!!!
الطفل المميز بشخصيته وبأسلوبه وبطريقته وبلماضته الجميله ودمه الخفيف هايندثر وحيختفي وحيتبقلنا الطفل اللي يفرح ابو درجات كتييير عالله تتبسطوا.... عاوزين نلغي الامتحانات في المرحله الابتدائيه علي الاقل ونركز علي الطفل الموهوب ونساعد الطفل البطئ الهادي ونقوم الطفل البخيل والأناني ونشجع الطفل الحنين الكريم ..عاوزين نلغي النقل الكتيير المبالغ فيه من علي السبوره .....عاوزين نلغي الحفظ والصم ...عاوزين نزود الاناشيد واللعب عاوزين ولادنا يفرحوا ويتنططوا من الفرحه .....أنا شخصياً عاوزه زينة تفضل مبهجه وفرحانة  وزينة في حياتنا مش عاوزه أقول كلمه ذاكر أو ذاكري في البيت خالص عاوزه أستمتع مع ولادي عاوزه الشنط تخف من علي ظهرهم والكراريس والكتب تقل خااالص لأقل حد ممكن وأقل من الممكن كمان.... عاوزه المدرسه تبقي فسحة جميله بيتقابلوا فيها مع اصحابهم ومدرسينهم عاوزه أطفال بلا عقد وكلاكيع وأمراض نفسيه عاوزه أضحك من قلبي وأفرح عااااااوزه اعيش.....،